وصفات فارس جيدي أسرار نجاح البقلاوة

أسرار نجاح البقلاوة 

1. عجينة البقلاوة لازم تكون طرية كي تلموها و تخلوها ترتاح نصف ساعة و تبداوها مباشرة
2. كي تحلو العجينة او قبل ما تفتحوها بالآلة أفتحوها بالمايزينة باش طبقات البقلاوة يكونو بارزين و جي مورقة و مقرشين
3. الحشو كي تشوخوه بمازهر و ملعقتين زبدة يكون مندي شوية ماشي مشمخ بزاف و ماشو يابس باش يكون طري كي يطيب
4. بين كل الطبقات نحطو خليط الزبدة حذاري تكثرو حطو قيس ما تدهنو الطبقة فقط
5. و أهم شيء حذاري ثم حذاري نضغطو بقوة على الطبقات رح يروحلهم التوريق و تولي عجينة وحدة
6. مهم جدا كي تحطو الحشو في الوسط تنثروه اي تحطوه بشوية و حذاري تضغطو عليه اذا ضغطتو عليه رح يكون صلب كي يطيب و الطبقات لي في الأسفل يروحلهم التوريق و تخسر البقلاوة
7. كي تقطعو البقلاوة الموس اغطسوه في الزبدة الذائبة مع شوية زيت باش تتقسم البقلاوة بسهولة و حركة الموس تكون من الاعلى للأسفل حذاري تحطوه و تسحبوه بقوة رح تخسرو شكلها
8. لازم غير تكملو تشكيل الطبقات تقسمو مباشرة البقلاوة ماتخلوهاش حتى تنشف العجينة رح تتقع كي تكونو تقسمو فيها و حطو من الفوق قطع صغيرة من الزبدو او زبدة ذائبة رح يمدولها لون شباب كي طيب
9. تقدرو ماطيبوش البقلاوة في نفس اليوم يعني طيبوها في الغد اذا صنعتوها في الليل مايصرالها والو لكن لاااازم تبيتوها في الثلاجة لازم
10. تحطو البقلاوة طيب حتى تشوفوها حمارت في الحواف تشعلو عليها من الفوق على نار هادئة و تعسوها
11. عسيلة لازم تكون واجدة و باردة غير تخرج البقلاوة من الفرن تعسلوها مباشرة و حاولو تعاودو تفتحو بالموس بين الحبات باش تشرب مليح و خلوها على الأقل يوم في الصينية بالعسيلة باش تشرب مليح و اذا ما كنتوش مزروبين تقدرو تخلوها حتى لخمس ايام عادي